Napagkakamalang "Kuripot" ang "Matipid"

Isa na naman itong post kung saan ako magsasalita ng kalaswaan hinggil sa pagiging Ilokano.

Hindi. Hindi ko dito tatalakayin ang mga hindi magagandang heneral na paguugali ng mga tubong Ilocandia (tulad ko). Tatalakayin ko ngayon kung bakit napagkakamalan ng mga ibang pangkat-etniko sa bansa ang pagiging praktikal ng mga Ilokano sa pagiging "kuripot".

Talagang nakasabit na nga sa pagkakilala ng mga Ilocano ang pagiging kuripot. Ilang beses ko nang naenkuwentro ito, lalong lalo na sa mga nakakakilala kong tubong ibang rehiyon ng Pilipinas. Pati nga mga ibang kakilala kong Ilokano, pinapalaganap ang pagkakuripot nila sapagkat true-blue Ilocano daw sila. Hindi nila nakikita na negatibo ang ibig sabihin ng pagiging kuripot.

Ano nga ba ang tunay na kahulugan ng salitang "kuripot"? Alam nating hindi positibo ang dating kapag binansagan mo ang isa tao na "kuripot ito. Pero hindi natin maiintindihan ang pagiging praktikal ng mga Ilocano kung hindi natin alam ang tunay na kahulugan ng salitang "kuripot".

Ang pagiging kuripot ay ang pagiging maramot sa pera, pagiging makapera, pagiging alagad ng pera. Mangilanngilan lamang ang mga kakilala kong Ilokano na kuripot. Sa aking karanasan (hindi ako pahalang dahil lamang Ilocano ako), hindi maramot sa pera ang karamihan sa mga nakikilala kong Ilocano. Mga kaibigan ko dati sa elementarya, nanlilibre kapag sinabi kong nawawala ang baon kong pera. Hindi ko lamang alam sa inyong naging mga karanasan ngunit ito ang masasabi ko base sa aking mga karanasan.

Isa pa, walang gaanong mga mayayaman sa Ilocandia. Kung ikukumpara sa mga Kabisayaan, walang gaanong mga tenyente sa rehiyon. Panahon pa ng mga Kastila, may mga sarili ng lupain ang mga magsasakang Ilocano sapagkat hindi nagkaroon ng interes ang mga Kastila sa pangit na uri ng lupa sa rehiyon. Dahil dito, walang gaanong mga tenyente ang nagmamay-ari ng mga lupain sa Ilocandia. Karamihan sa mga Ilocano'y mahihirap na kadalasang sa sarili lamang nakasalalay ang kabuhayan, hindi sa mga tenyente ng lupaing sinasaka. Bakit binanggit ko ang istatus ng kayamanan ng mga Ilocano? Para maintindihan ninyo kung bakit praktikal at simple lamang ang mga pangangailangan ng mga Ilocano, maliban na lamang sa pagkakaroon ng ambisyon at kagustuhang pumalad sa buhay. Hindi palagastos ang mga Ilocano sa pera sapagkat alam nilang malaki ang tulong ng paghuhulog ng pera sa banko. Na ang pagiging matipid sa pera ang makakapagaahon sa kanilang kabuhayan.

Dito nga napagkakamalang kuripot ang mga Ilocano, ang pagiging matipid nila. Kadalasang napagiisa ang kahulugan ng "kuripot" at "matipid". Para mapaglinaw ito, ang "kuripot" ay isang taong ubod ng yaman sa pera ngunit hindi ito gumagastos sa mga pangangailangan tulad ng pagkain. Ito ang labis na kasalungat ng pagiging magastos. Ang "matipid" naman ay hindi gaanong gumagastos sa mga bagay na hindi kailangan.

Kung gugunitain ang sumasailalim na dahilan sa pagtingin ng mga hindi Ilocano sa pagiging kuripot ng mga Ilocano, makikita natin na hindi gaanong maganda ang pagtingin ng mga pangkat-etnikong ito sa bisa ng pagiging matipid. Maaring paghinalahin na ang mga nasabing pangkat-etniko na ito'y hindi marunong magtipid ng pera o kaya't hindi alam ang tunay na kahulugan ng praktikalidad.

Kung gayon pala, hindi dapat minamasama ang pagiging matipid ng mga Ilokano. Ito nga ang dahilan kung bakit ang karamihan ng mga bahay ng mga mahihirap sa Ilocandia ay gawa sa bato, kung ikukumpara sa mga mahihirap sa Kabisayaan. Ito nga ang dahilan kung bakit umaahon ang mga Ilokano kapag sila'y nagibang tirahan sa mga malalayong lugar. Ito nga ang dahilan kung bakit karamihan sa mga nagkakapalad na maging propesyonal sa mga ibang bansa sa mundo ay Ilocano. Ito ang dahilan kung bakit ang Ilocos Norte (sinasabi ng karamihan na ito ang puso ng Ilocandia) ay hindi gaanong apektado kapag dumagsa ang mga panahon na bumagsak ang ekonomiya ng bansa.